الموستيكير المضلمة

شنو كتزيد على العادية

نفس الإطار ونفس الصنع، ولكن النسيج مختلف: كثر كثافة وكحل. النتيجة أنه كيحبس الناموس بحال العادي، وزيادة على هادشي كيقطع جزء كبير من الضو اللي كيدخل. البيت كيولي مضلم بلا ما تسد الشرجم.

علاش الناس كيختاروها

الشمس ديال العشية بأݣادير قاسحة، والبيوت اللي كتشوف الغرب كتسخن وكتضوي بزاف. المضلم كيحل هاد المشكل بلا رِدو وبلا ما تحبس الهوا — الشرجم كيبقى محلول والبيت كيبقى بارد.

وللي كيخدم بالليل وكينعس فالنهار، هادي هي الفرق بين نعاس مزيان ونعاس مقطوع.

الثمن والصنع

650 درهم للمتر المربع: العرض × الارتفاع × 650. الحد الأدنى متر مربع واحد.

الفرق مع العادية هو 100 درهم فالمتر المربع. ف شرجم عادي ديال 1.2م × 1.5م، الفرق كيجي حوالي 180 درهم — وهو اللي كيدير الفرق فبيت النعاس.

نوع التركيب

المضلم كيتصاوب بالأكورديون فقط — هو اللي كيتحمل هاد التوال الكثيف. الانرولابل والكولّيسة كيجيو بالتوال العادي فقط. صيفط لينا القياسات ف واتساب.